ចេញផ្សាយ ថ្ងៃសៅរ៍ ១៥រោច ខែផល្គុន ឆ្នាំជូត ទោស័ក ពស២៥៦៤ ត្រូវនឹងថ្ងៃទី១៣ ខែមីនា ឆ្នាំ២០២១
ភ្នំពេញ៖ ដោយមេីលឃេីញពីទុក្ខលំបាក និងក្តីអាណិតអាសូរយ៉ាងពន់ពេក កាលពីថ្ងៃសុក្រ ទី១២ ខែមីនា ឆ្នាំ២០២១ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យមន្ត្រីចុះសួរសុខទុក្ខ ព្រមទាំងនាំយកគ្រឿងបរិភោគមួយចំនួន និងថវិកាចំនួន១០លានរៀល ផ្តល់ជូនលោក ឡុង ប៊ុនណា ដែលរងគ្រោះថ្នាក់ចរាចរណ៍ធ្ងន់ធ្ងរ កាលពីខែធ្នូ ឆ្នាំ២០២០កន្លងទៅ បណ្តាលឱ្យស្លាប់មួយកំណាត់ខ្លួន ហេីយត្រូវប្រពន្ធបោះបង់ចោលទុកឱ្យរស់នៅយ៉ាងកម្សត់ក្នុងខ្ទមក្បែរមាត់ទឹកតែម្នាក់ឯង។ ដោយឃេីញបែបនេះ ម្តាយមីង បាននាំយកមកមេីលថែនៅក្នុងផ្ទះជួលជាបណ្តោះអាសន្ន ស្ថិតនៅភូមិ១ ក្រុមទី៤ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
នៅក្នុងឱកាសចុះសួរសុខទុក្ខនោះ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងចូលរួមសោកស្តាយចំពោះឧប្បទ្ទវហេតុដែលបានកើតឡើង។
ជាមួយគ្នានេះ លោកជំទាវ ក៏បានផ្តាំផ្ញើសូមថែទាំសុខភាពឱ្យបានល្អ ត្រូវប្រឹងប្រែងតស៊ូដេីម្បីជីវិតរស់នៅបន្តទៀតទោះបីជាពិការកាយ តែសូមកុំពិការចិត្ត ជាពិសេស រស់នៅមានអនាម័យ អនុវត្តឱ្យបានខ្ជាប់ខ្ជួន ៣ការពារ ៣កុំ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩។ ទន្ទឹមនឹងនេះ លោកជំទាវ បានផ្តាំផ្ញេីដល់ម្តាយមីង សូមបន្តជួយមេីលថែទាំក្មួយកំព្រាពិការ ជាបន្តទៀតផង ដេីម្បីភាពកក់ក្តៅ និងជាទីពឹងពាក់ក្នុងជីវិត។
លោក ឡុង ប៊ុនណា បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរលើកទឹកចិត្ត និងជួយសម្រាលការលំបាកដល់ប្រជាពលរដ្ឋរងគ្រោះដោយគ្មានការរេីសអេីងអ្វីឡេីយ។
សូមជំរាបថា អំណោយផ្តល់ជូនលោក ឡុង ប៊ុនណា រួមមាន អង្ករ៥០គីឡូក្រាម,មី២កេស,ត្រីខ២០កំប៉ុង,ឃីត(មុងភួយសារុងក្រមាអាវយឺត)២កញ្ចប់ និងថវិកា១០លានរៀល។ ដោយឡែក អនុសាខាកាកបាទក្រហមកម្ពុជា ខណ្ឌជ្រោយចង្វារ បានផ្តល់គ្រឿងឧបភោគបរិភោគ និងថវិកាមួយចំនួនផងដែរ៕
