ចេញផ្សាយ ថ្ងៃចន្ទ ៧រោច ខែពិសាខ ឆ្នាំជូត ត្រីស័ក ពស២៥៦៥ ត្រូវនឹងថ្ងៃទី០៣ ខែឧសភា ឆ្នាំ២០២១
ភ្នំពេញ៖ លោក ជីវ កក្តា ប្រធានគណបក្សខ្មែរស្រឡាញ់ជាតិ នៅថ្ងៃទី០៣ ខែឧសភា ឆ្នាំ២០២១នេះ បានចេញសារអបអរសាទរ ទិវាសេរីភាពសារព័ត៌មានពិភពលោក ០៣ឧសភា ខួប២៨ឆ្នាំ។
ដោយក្នុងនោះ លោក ជីវ កក្តា បានលើកឡើងថា អំណាចសារព័ត៌មាន ឬប្រព័ន្ធផ្សព្វផ្សាយព័ត៌មាន គឺជាសសរគ្រិះមួយក្នុងចំណោមសសរគ្រិះដទៃទៀតនៅក្នុងសង្គមប្រជាធិបតេយ្យ។ លោកថា សារព័ត៌មានដែលសេរី គ្មានការត្រួតពិនិត្យ និងរិតត្បិត មានសារៈសំខាន់ក្នុងសង្គមជាតិរបស់យើង ដើម្បីធានាដល់សេរីភាពនៃគំនិត និងការសំដែងមតិ និងការទទួលបានសិទ្ធិដទៃទៀតដែលធានាដោយរដ្ឋធម្មនុញ្ញ ដូចជាសិទ្ធិក្នុងការសំដែងមតិអំពីបញ្ហាសាធារណៈ និងបញ្ហានយោបាយជាដើម…។
ក្នុងសារអបអរសាទរសេរីភាពសារព័ត៌មានពិភពលោក របស់លោក ជីវ កក្តា បន្ថែមទៀតថា សារព័ត៌មានពិត ប្រកបដោយវិជ្ជាជីវៈ និងមានក្រមសីលធម៌ អ្នកសារព័ត៌មានត្រឹមត្រូវ ដែលធានាដោយច្បាប់សារព័ត៌មាន មិនគិតពីផលប្រយោជន៍ឯកជន ឬនិន្នាការគណបក្សនយោបាយ គឺពិតជានាំមកនូវផលប្រយោជន៍ និងការជួយសង្គមជាតិយ៉ាងធំធេង ព្រមទាំងផ្តល់ព័ត៌មានពិតជូនដល់ប្រជាពលរដ្ឋម្ចាស់ឆ្នោត ម្ចាស់ប្រទេស ដែលនាំឲ្យសង្គមជាតិយើងមានសេរីភាព យុត្តិធម៌ និងសន្តិភាពពិតប្រាកដជាក់ជាមិនខាន។
លោក ជីវ កក្តា បន្តថា ស្ថិតក្នុងថ្ងៃទិវានៃសេរីភាពសារព័ត៌មានពិភពលោក ឆ្នាំ២០២១នេះ សេរីភាពសារព័ត៌មាន នៅតែត្រូវបានកត់សម្គាល់ឃើញថា ការត្រួតពិនិត្យ និងការរិតត្បិត មកលើអ្នកសារព័ត៌មាន និងប្រព័ន្ធផ្សព្វផ្សាយព័ត៌មាន នៅតែមានការយាយី ឬការធ្វើទុក្ខបុកម្នេញ ឬបំភិតបំភ័យ ដោយការបាញ់សម្លាប់ ការចាប់ឃុំខ្លួនក្នុងពន្ធនាគារ និងការប្រើអំពើហិង្សា ការវាយដំលើរូបរាងកាយ ការគំរាមដោយប្រើអំពើហិង្សាចំពោះអ្នកសារព័ត៌មាននៅពេលបំពេញការងារ ឬការចុះផ្សាយ ឬរាយការណ៍ព័ត៌មានដែលប៉ះពាល់ដល់ផលប្រយោជន៍របស់មន្ត្រីធំៗ និងអ្នកមានអំណាច ព្រមទាំងការប្រើប្រាស់ប្រព័ន្ធតុលាការដោយប្រើច្បាប់ព្រហ្មទណ្ឌជំនួសច្បាប់ស្តីពីរបបសារព័ត៌មានទៅវិញ។
ឆ្លៀតក្នុងឱកាសនេះ លោក ជីវ កក្តា ក៏បានអំពាវនាវដល់រដ្ឋាភិបាល បន្តការស៊ើបអង្កេតសំណុំរឿងឃាតកម្មលើអ្នកសារព័ត៌មានជាច្រើននាពេលកន្លងមក យកមកអនុវត្តតាមផ្លូវច្បាប់ ដើម្បីផ្តល់ភាពយុត្តិធម៌ដល់ក្រុមគ្រួសារជនរងគ្រោះ និងដើម្បីបញ្ចប់អំពើនិទណ្ឌភាពនៅក្នុងសង្គមជាតិយើង និងក៏សូមផ្តល់នូវការលើកទឹកចិត្ត ក៏ដូចជាផ្តល់នូវការការពារសុវត្ថិភាពឱ្យបានខ្ពស់ដល់អ្នកសារព័ត៌មាន ដើម្បីឱ្យពួកគាត់អាចអនុវត្តសិទ្ធិក្នុងការចុះយកព័ត៌មាន និងរាយការណ៍ព័ត៌មានពិតប្រាកដ ដោយសេរី និងដោយគ្មានការភ័យខ្លាច។
សូមជំរាបថា កម្ពុជា នៅតែត្រូវបានគេមើលឃើញថា សេរីភាពសម្រាប់អ្នកសារព័ត៌មានឯករាជ្យ នៅមិនទាន់ត្រូវបានសេរីនៅឡើយ។ តែយ៉ាងណា ការលើកឡើងនេះ ត្រូវបានអ្នកជំនាញព័ត៌មានដែលមាននិន្នាការគាំទ្ររដ្ឋាភិបាល ទាត់ចោលទាំងស្រុង។
បើទោះជាមានការទាត់ចោលដូចនេះក្តី កម្ពុជានៅតែមានអ្នកសារព័ត៌មានកំពុងជាប់ឃុំ ឬបន្តរងការចោទប្រកាន់តាមរយៈបទព្រហ្មទណ្ឌ ដែលមិនត្រូវបានយកច្បាប់ ស្តីពី របបសារព័ត៌មាន មកអនុវត្តន៍ឡើយ ខុសពីអ្នកសារព័ត៌មានដែលគាំទ្ររដ្ឋាភិបាល ក្រោយការសុំទោសជាសាធារណៈ ត្រូវបានរួចខ្លួនជារៀងរហូត៕
