បរទេស៖ កាលពីថ្ងៃសុក្រ ទាហានរុស្ស៊ី និងអ៊ុយក្រែន បានប្រយុទ្ធគ្នានៅជាយរដ្ឋធានីកៀវ ប្រទេសអ៊ុយក្រែន ដែលជាថ្ងៃទី២បន្ទាប់ពីប្រធានាធិបតីរុស្ស៊ីលោក Vladimir Putin បានបញ្ជាឱ្យមាន«ប្រតិបត្តិការយោធាពិសេស» មួយដែលជាការឈ្លានពានលើប្រទេសអ៊ុយក្រែន ដែលជាប្រទេសជិតខាងខ្លួន។
ស្របពេលជាមួយគ្នានោះ មេដឹកនាំប្រទេសលោកខាងលិចបានបង្កើនកិច្ចខំប្រឹងប្រែងការទូតរបស់ខ្លួន ដើម្បីបញ្ចប់អំពើហិង្សានៅប្រទេសអ៊ុយក្រែន ដោយបានចាត់វិធានការដាក់ទណ្ឌកម្មទ្រង់ទ្រាយធំលើរុស្ស៊ី។
កាសែត The New York Times រាយការណ៍ថា ខ្លួនបានផ្ទៀងផ្ទាត់វីដេអូនៃការផ្ទុះជាច្រើនកន្លែងដែលបានបង្ហាញពីកម្ទេចបាក់បែកយ៉ាងច្រើននៅក្នុងរដ្ឋធានីកៀវ។ កាសែតនេះក៏បានរាយការណ៍ផងដែរពីវីដេអូ ដែលទំនងដូចជាការបាញ់កាំជ្រួចមីស៊ីលពីដីទៅអាកាសយ៉ាងតិចក៏២ដែរ នៅជិតទីក្រុងកៀវ មុនពេលដែលការផ្ទុះនោះ។
នៅភាគខាងជើងប្រទេសអ៊ុយក្រែនវិញ កងទ័ពរុស្ស៊ី បានកាន់កាប់រោងចក្រថាមពល Chernobyl កាលពីថ្ងៃព្រហស្បតិ៍ម្សិលមិញ។ប្រធានាធិបតីអ៊ុយក្រែន លោក Volodymr Zelenskyy បាននិយាយថា៖ «នេះជាការប្រកាសសង្គ្រាមប្រឆាំងនឹងអឺរ៉ុបទាំងមូល»។
Chernobyl ជាទីតាំងរោងចក្រអាវុធនុយក្លេអ៊ែរ ដែលធ្លាប់មានការផ្ទុះដ៏អាក្រក់បំផុតរបស់ពិភពលោកក្នុងអតីតកាលកន្លងមក។ ទីតាំងនេះនិងកន្លែងជុំវិញទីនោះ នៅពុំទាន់មានមនុស្សទៅរស់នៅនៅឡើយទេ ចាប់តាំងពីមានគ្រោះមហន្តរាយផ្ទុះកាលពីឆ្នាំ១៩៨៦មក។
ប្រភព៖ #VOAKHMER
