ភ្នំពេញ៖ លោក កឹម សុខា អតីតមេដឹកនាំនៃអតីតគណបក្សសង្គ្រោះជាតិ នៅតែជាមេដឹកនាំគណបក្សប្រឆាំងដ៏មានឥទ្ធិពល ដែលស្ថិតក្នុងក្រសែភ្នែករបស់មិត្តអន្តរជាតិ ត្រូវបានយកចិត្តទុកដាក់ជាទីបំផុត។
ក្នុងនោះ គ្រប់បណ្តាទូតនានាដែលជាមិត្តរបស់កម្ពុជា ពេលឈានជើងមកដល់ប្រទេសកម្ពុជា គឺមិនអាចបំភ្លេច ឬមិនជួបលោក កឹម សុខា ឡើយ ដោយគ្រប់បណ្តាទូតប្រទេសនៃលោកសេរីទាំងនោះ តែងជួបលោក កឹម សុខា ជាបន្តបន្ទាប់ ដើម្បីស្តាប់ការលើកឡើងរបស់លោក កឹម សុខា ចំពោះភាពអយុត្តិធម៌មកលើរូបលោក ព្រមទាំងប្រជាពលរដ្ឋខ្មែរផងដែរ។
ក្នុងនោះ វាជាកិត្តិយស ដែលករណីលោក កឹម សុខា ត្រូវបានស្ថិតក្នុងរបៀបវារៈនៃបេសកកម្មរបស់គណៈប្រតិភូ សហភាពអឺរ៉ុប ដឹកនាំដោយលោកស្រី Paola PAMPALONI អនុប្រធានទទួលបន្ទុកតំបន់អាស៊ី បាស៊ីហ្វិក នៃគណៈកម្មការកិច្ចការបរទេសសហភាពអឺរ៉ុប មកកាន់ប្រទេសកម្ពុជា ជាផ្នែកមួយនៃការសន្ទនានយោបាយជាន់ខ្ពស់ រវាងសហភាពអឺរ៉ុប-ប្រ៊ូសសែល និងសមភាគីកម្ពុជា ក្នុងក្របខណ្ឌគណៈកម្មការចម្រុះ សហភាពអឺរ៉ុប – កម្ពុជា លើកទី១១។
ស្ថិតក្នុងបរិយាកាសនេះ លោក កឹម សុខា និងលោកស្រីប្រធានគណៈប្រតិភូ បានជួបពិភាក្សាការងារ និង ផ្លាស់ប្តូរយោបល់ ព្រមទាំងទស្សនៈគ្នាដោយផ្ទាល់ នៅរាធានីភ្នំពេញ ដោយក្នុងជំនួបនោះ លោកស្រីប្រធានគណៈប្រតិភូបានសម្តែងនូវការចាប់អារម្មណ៍ខ្លាំងអំពីលំហរប្រជាធិបតេយ្យ សិទ្ធិស៊ីវិល និងនយោបាយ សិទ្ធិសង្គមស៊ីវិល និងសិទ្ធិសេរីភាពរបស់លោក ដែលពាក់ពន្ធ័នឹងដំណើរនីតិវិធីយឺតយ៉ាវរបស់តុលាការ។
លោកស្រី Paola PAMPALONI អនុប្រធានទទួលបន្ទុកតំបន់អាស៊ីបាស៊ីហ្វិក នៃគណៈកម្មការកិច្ចការបរទេសសហភាពអឺរ៉ុប និងលោក កឹម សុខា
លោក កឹម សុខា បានបញ្ជាក់ថា យោងតាមសេចក្តីប្រកាសព័ត៌មានរួមរបស់គណកម្មការចម្រុះកម្ពុជា-សហភាពអឺរ៉ុប និងការដែលលោកបានជួបពិភាក្សាផ្ទាល់ជាមួយគណៈប្រតិភូអស់រយៈពេលជាច្រើនម៉ោងផងនោះ លោកអាចវាយតម្លៃបានថា កិច្ចប្រជុំនេះមានសារៈសំខាន់ណាស់ ហើយក៏ជាកាលានុវត្តភាពមួយដែលកម្ពុជាអាចទាញយកផលប្រយោជន៍សម្រាប់ប្រជាពលរដ្ឋខ្មែរ លើវិស័យនានាពីប្រទេសជឿនលឿននៃមហាអំណាចសហភាពអឺរ៉ុបនេះ។
លោក កឹម សុខា បន្ថែមថា អ្វីដែលលោកបានយល់ដឹងតាមរយៈគណៈប្រតិភូក្នុងជំនួបនេះ ចំពោះសហភាពអឺរ៉ុប មានគោលបំណងពង្រឹងកិច្ចសហប្រតិបត្តិការណ៍ជាមួយកម្ពុជា គឺចង់ជួយដល់សេដ្ឋកិច្ចកម្ពុជា ការលើកកម្ពស់ជីវភាពប្រជាពលរដ្ឋខ្មែរ ជាពិសេសលើវិស័យវាយនភណ្ឌ និងរោងចក្រកាត់ដេរ ដូចជា៖ វិស័យពាណិជ្ជកម្ម ការវិនិយោគជាដើម ក៏ប៉ុន្តែត្រូវអនុវត្តតាមគុណតម្លៃស្នូលរបស់សហភាពអឺរ៉ុប គឺការគោរពសិទ្ធិមនុស្ស លទ្ធិប្រជាធិបតេយ្យ សិទ្ធិស៊ីវិល និងនយោបាយ សេរីភាពគ្រឹះ រួមទាំងសេរីភាពសារព័ត៌មាន អង្គការសង្គមស៊ីវិល និងសហជីព នីតិរដ្ឋ ព្រមទាំងការបោះឆ្នោតស្របតាមបទដ្ឋាន និងជាគោលការណ៍ប្រជាធិបតេយ្យ និងពហុនិយមដែលជាជម្រើសរបស់អ្នកបោះឆ្នោត៕
លោក កឹម សុខា និង លោកស្រី Paola PAMPALONI អនុប្រធានទទួលបន្ទុកតំបន់អាស៊ីបាស៊ីហ្វិក នៃគណៈកម្មការកិច្ចការបរទេសសហភាពអឺរ៉ុប
