ភ្នំពេញ៖ អតីតប្រធាន នៃអតីតគណបក្សសង្គ្រោះជាតិ លោក កឹម សុខា បានសម្តែងការសោកស្តាយនៅថ្ងៃនេះ ចំពោះការមិនអនុញ្ញាតរបស់តុលាការ សម្រាប់វត្តមានលោកអញ្ជើញចូលរួម តាមការតបអញ្ជើញ របស់រដ្ឋាភិបាលសហព័ន្ធអាល្លឺម៉ង់ និងវេទិកា គោលនយោបាយពិភពលោក (World Policy Forum)។
លោក កឹម សុខា ថារដ្ឋាភិបាលសហព័ន្ធអាល្លឺម៉ង់ និងវេទិកា គោលនយោបាយពិភពលោក (World Policy Forum) បានផ្តល់កិត្តិយសអញ្ជើញរូបលោក ចូលរួមធ្វើបាឋកថា ចែករំលែកនូវទស្សនៈ និងបទពិសោធន៍ក្នុង« សន្និសីទកំពូល ស្តីពី ដំណោះស្រាយសកល (Global Solution Summit) » នៅថ្ងៃនេះ នាទីក្រុងប៊ែរឡាំង ប្រទេសអាល្លឺម៉ង់។
លោក កឹម សុខា ថាតាមការរំពឹងទុក អ្នករៀបចំកម្មវិធី សង្ឃឹមថាការចូលរួមរបស់លោក នឹងអាចផ្តល់ផលប្រយោជន៍ដល់ពិភពលោក និងក៏ជាកេរ្តិ៍ឈ្មោះកិត្តិយសរបស់កម្ពុជាផងដែរ។ ក៏ប៉ុន្តែ គួរឱ្យសោកស្តាយ ដែលលោកមិនអាចធ្វើដំណើរទៅចូលរួម វេទិកាពិភពលោកដ៏មានសារ សំខាន់ តាមកម្មវិធីដែលបានគ្រោងទុកនេះ ដោយសារតែសិទ្ធិសេរីភាពរបស់លោកត្រូវបានហាមឃាត់។
យ៉ាងណាលោក កឹម សុខា បានផ្ញើសារ «សូមឱ្យមនុស្សជាតិទាំងឡាយ មានសិទ្ធិសេរីភាព មានយុត្តិធម៌ និ ងមានព្រហ្មវិហារធម៌ ដើម្បីឱ្យពិភពលោកមានសន្តិភាពពិត»។ស្របពេលជាមួយគ្នានេះ សហមេធាវីលោក កឹម សុខា ក៏បានចេញសេចក្តីប្រកាសព័ត៌មាន ពីការមិនអាច ទៅចូលរួមជាវាគ្មិន ក្នុងការធ្វើបាឋកថាដោយផ្ទាល់របស់លោក នៅក្នុងសន្និសីទកំពូល ស្តីពី ដំណោះស្រាយសកល នៃវេទិការ គោលនយោបាយពិភពលោក នាទីក្រុងប៊ែរឡាំង ប្រទេសអាល្លឺម៉ង់ ដែលត្រូវប្រព្រឹត្តិទៅនាថ្ងៃទី២៨ដល់ថ្ងៃទី២៩ ខែមីនា ឆ្នាំ២០២២ តាមការអញ្ជើញរបស់ វេទិកា គោលនយោបាយពិភពលោក និង រដ្ឋាភិបាលសហព័ន្ធអាល្លឺម៉ង់បានទេនោះ៕
#TNTV #TNHOTNEWS #KEMSOKHA #កឹមសុខា #អាល្លឺហ្មង់
