ភ្នំពេញ៖ លោក កឹម សុខា កើតនៅថ្ងៃទី២៧ ខែមិថុនា ឆ្នាំ១៩៥៣ ក្នុងត្រកូលកសិករ នៅឃុំពពេល ស្រុកត្រាំកក់ ខេត្តតាកែវ ដោយក្នុងនោះកាលពីថ្ងៃទី២៧ ខែមិថុនា ឆ្នាំ២០២២នេះ គឺជាគម្រប់ខួបឈានចូលវ័យ៧០ឆ្នាំរបស់លោក ដោយមានការគោរពស្រឡាញ់ ទទួលបានការស្វាគមន៍នៃការជូនពរពីតំណាងពលរដ្ឋតាមបណ្តាខេត្តនានា នៅគេហដ្ឋានក្នុងទីក្រុងភ្នំពេញ។
លោក កឹម សុខា ក្នុងថ្ងៃខួបកំណើតឈានចូលវ័យ៧០ឆ្នាំ
លោក កឹម សុខា បានបញ្ចប់ការសិក្សានៅសាលាបឋមសិក្សាអង្គគោល (ស្លាគូរ) ស្រុកសំរោង ខេត្តតាកែវ នៅឆ្នាំ១៩៦៥ និងបញ្ចប់ការសិក្សានៅវិទ្យាល័យកូនចៅសម្តេចឪ (អង្គតាសោម) ស្រុកត្រាំកក់ ខេត្តតាកែវ នៅឆ្នាំ១៩៧០។
ក្រោយរដ្ឋប្រហារ ឆ្នាំ១៩៧០ លោក កឹម សុខា បានមកបន្តការសិក្សានៅទីក្រុងភ្នំពេញ ស្នាក់នៅវត្តស្រះចក ដោយជីវភាពខ្វះខាត លោកត្រូវបានការជួយទំនុកបម្រុងពីព្រះសង្ឃក្នុងការសិក្សារៀនសូត្រ និងពេលល្ងាចឆ្លៀត ស្រោចបន្លែ ដែលបានសុំដីគេដាំនៅច្រាំងទន្លេក្បែរឃ្លាំងគយ។ លុះចាប់ពីម៉ោង៧ ដល់ម៉ោង៩យប់ លោក កឹម សុខា បានខ្ចីស៊ីក្លូអ្នកស្នាក់នៅក្នុងវត្តជាមួយ ដើម្បីធាក់រកប្រាក់កម្រៃបន្ថែមសំរាប់ទិញកាសែតអានរាល់ថ្ងៃ និងទិញសម្ភារៈសិក្សា។ នៅឆ្នាំ១៩៧០ ដល់ឆ្នាំ១៩៧៣ លោក កឹម សុខា បានសិក្សាសញ្ញាប័ត្រមធ្យមសិក្សាកម្រិត២ នៅវិទ្យាល័យបឹងកក់ (ទួលគោក) នៅឆ្នាំ១៩៧៣ ដល់ ឆ្នាំ១៩៧៥ លោក កឹម សុខា សិក្សានៅមហាវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច ឆ្នាំទី២ លុះនៅឆ្នាំ១៩៨១ ដល់ឆ្នាំ១៩៨៦ លោក កឹម សុខា បានជាប់អាហារូបករណ៍ ចេញទៅសិក្សាថ្នាក់អនុបណ្ឌិត វិទ្យាសាស្ត្រ នៅសាកលវិទ្យាល័យ បច្ចេកវិទ្យាគីមី នាទីក្រុងប្រ៉ាក ប្រទេសឆេកូស្លូវ៉ាគី។
លោក កឹម សុខា បានចាប់ផ្តើមប្រឡូកក្នុងឆាកនយោបាយនៅឆ្នាំ១៩៩៣ ជាមួយគណបក្សប្រជាធិបតេយ្យសេរីនិយមព្រះពុទ្ធសាសនា របស់លោកតា សឺន សាន។ លោកបានជាប់ឆ្នោតជាតំណាងរាស្ត្រ ខេត្តតាកែវ នៅក្នុងការបោះឆ្នោតជាតិ ឆ្នាំ១៩៩៣ ដែលរៀបចំដោយ អ៊ុនតាក់។
នៅឆ្នាំ១៩៩៩ លោក កឹម សុខា បានចូលរួមនយោបាយជាមួយ គណបក្ស ហ៊្វុនស៊ីនប៉ិច ហើយក្រោយមក លោកជាប់ឆ្នោតជាសមាជិកព្រឹទ្ធសភា។ នៅឆ្នាំ២០០២ លោក កឹម សុខា បានឈប់ពីនយោបាយ និងបង្កើតអង្គការសិទ្ធិមនុស្សមួយឈ្មោះថា មជ្ឈមណ្ឌលសិទ្ធិមនុស្សកម្ពុជា (CCHR)។ ហើយលោកបានលាលែងពីមជ្ឈមណ្ឌលសិទ្ធិមនុស្សកម្ពុជា ដើម្បីបង្កើត គណបក្សនយោបាយថ្មីមួយ ដែលមានឈ្មោះថា គណបក្សសិទ្ធិមនុស្ស (HRP) នៅក្នុងឆ្នាំ២០០៧។
នៅឆ្នាំ២០១២ លោក កឹម សុខា បានក្លាយជាអនុប្រធានគណបក្សសង្គ្រោះជាតិ ដែលលោកជាអ្នកនយោបាយដ៏មានប្រជាប្រិយភាពនៃវោហារសាស្រ្តនយោបាយមូលដ្ឋាន។ នៅក្នុងអំឡុងខែមីនា ឆ្នាំ២០១៧ លោក កឹម សុខា បានក្លាយជាប្រធានគណបក្សសង្គ្រោះជាតិ ហើយលោកត្រូវបានចាប់ខ្លួនកាលពីថ្ងៃទី០៣ ខែកញ្ញា ឆ្នាំ២០១៧ ក្រោមបទចោទ សន្និដ្ឋិភាពជាមួយរដ្ឋបរទេស ហើយគណបក្សសង្គ្រោះជាតិ ត្រូវបានរំលាយដោយតុលាការកំពូល នៅថ្ងៃទី១៦ ខែវិច្ឆិកា ឆ្នាំ២០១៧ រហូតដល់បច្ចុប្បន្ន បើទោះបីលោកមានសេរីភាពក្តី តែបណ្តឹងនៅតែបន្ត រៀងរាល់សប្តាហ៍ នៅតុលាការសាលាដំបូងរាជធានីភ្នំពេញ។
យ៉ាងណា វាក៏មិនមែនជារឿងចៃដន្យ និងធម្មតាដែរ សម្រាប់ជីវិតលោក កឹម សុខា ជាកូនកសិករ បានក្លាយជាមេដឹកនាំនយោបាយដ៏មានប្រជាប្រិយភាពទាំងនៅលើឆាកជាតិ និង អន្តរជាតិ ប្រើប្រៀបធៀប និងអ្នកនយោបាយ៣រូបផ្សេងទៀត ដែលសុតតែទទួលបានកេរ្តិ៍តំណែលមរតក ពីឪពុក និងអ្នកជួយខ្លួនឱ្យក្លាយជាមេដឹកនាំរហូតដល់បច្ចុប្បន្ននេះ ដែលក្នុងនោះរួមមាន៖
១ ព្រះអង្គម្ចាស់ នរោត្តម រណឬទ្ធិ អតីតព្រះប្រធានគណបក្ស ហ្វ៊ុនស៊ិនប៉ិច ដែលទទួលបានកេរ្តិ៍តំណែល ពីព្រះបិតាព្រះអង្គ គឺព្រះបាទ នរោត្តម ស៊ីហនុ ព្រះបរមរតនកោដ្ឋ
២ លោក សម រង្ស៊ី ដែលទទួលបាន កេរ្តិ៍តំណែល ពីឪពុក គឺលោក សម សារី ដែលជាអ្នកនយោបាយល្បីឈ្មោះមួយរូបជំនាន់សម្តេចឪ
៣ លោកនាយករដ្ឋមន្រ្តី ហ៊ុន សែន ជាកូនកសិករក្តី តែលោកទទួលបានមរតក នៃការជួយជ្រំជ្រែងពីប្រទេសវៀតណាម ដូចប្រវត្តិសាស្រ្តបានចារទុកនៃជិវិតតស៊ូរំដោះជាតិរបស់លោក
ដោយឡែក អ្នកនយោបាយអហិង្សានិយម កឹម សុខា គ្មានឡើយមរតក និង កេរ្តិ៍តំណែល នៃការទទួលបានពីបុគ្គល ឬឪពុក ដោយលោកខិតខំប្រឹងប្រែងក្នុងជិវិតឆ្លងកាត់ព្យុះភ្លៀងរាប់មិនអស់ ចូលដល់វ័យ៧០ឆ្នាំ កម្លាំងនៅតែរឹងមាំ ស្មារតីជាតិ ឆន្ទៈនៅតែបន្តដ៏មុះមុតគ្មានរុញរា មិនរត់ចោលរាស្រ្តដែលគាំទ្រ ស៊ូរបន្តតតាំងក្តីនៅតុលាការ ដើម្បីសេរីភាព យុត្តិធម៌ និងលទ្ធិប្រជាធិបតេយ្យ ដែលធ្វើឱ្យពលរដ្ឋស្នេហាជាតិ និងមិត្តបរទេសចាត់ទុកលោកជាអ្នកនយោបាយដ៏សំខាន់ អហិង្សានិយម និងស្មោះត្រង់ចំពោះជាតិ មាតុភូមិ ដែលធ្វើឱ្យកិត្តិនាមរបស់លោក កាន់តែល្បីឆន្ទឺលើឆាកអន្តរជាតិ ដែលមិត្តបរទេសមិនដែលរំលងវត្តមានរបស់លោកឡើយ ចំពោះបេសកកម្មរបស់ពួកគេនៅកម្ពុជា និងការតាមដានក្តីរបស់លោកនៅតុលាការ ព្រោះពួកគេបានចាត់ទុកលោក កឹម សុខា នៃគ្រឹះដ៏សំខាន់មួយផ្នែកទៀត គឺជាមេដឹកនាំតំណាងសម្លេងប្រជាពលរដ្ឋខ្មែរ ដែលគាំទ្រលទ្ធិប្រជាធិបតេយ្យពិតប្រាកដនៅកម្ពុជា៕
#TNTV #TNHOTNEWS #TNTVONLINE #KEMSOKHA #SAMRIANSY #HUNSEN #កឹមសុខា #ហ៊ុនសែន #សមរង្ស៊ី #គណបក្សសង្គ្រោះជាតិ #មរតក #អហិង្សា #លទ្ធិប្រជាធិបតេយ្យ #យុត្តិធម៌ #សេរីភាព
