ចេញផ្សាយ ថ្ងៃអាទិត្យ ទី១៥ ខែមីនា ឆ្នាំ២០២០
ក្រចេះ៖ កាលពីព្រឹកថ្ងៃទី១៣ ខែមីនា ឆ្នាំ២០២០ សកម្មជនព្រៃឈើ ចំនួន៤នាក់ ត្រូវបានបុគ្គលិកក្រុមហ៊ុន ស៊ីងបាយអូតិក (Think Biotech) ចាប់ឃាត់ខ្លួននិងបានបញ្ជូនទៅឃុំនៅអធិការដ្ឋាននគរបាល ស្រុកសំបូរ ខេត្តក្រចេះ។
សកម្មជនបរិស្ថានទាំង៤នាក់រួមមាន៖ ១ លោក អ៊ូចឡេង ប្រធានអង្គការ ក្រុមកិច្ចការពិសេសសិទិ្ធមនុស្សកម្ពុជា និងជាម្ចាស់ពានរង្វាន់វីរៈជនបរិស្ថាន Goldman Environmental Prize ឆ្នាំ២០១៦, ២ លោក ខេម សុខឃី, ៣ លោក ស្រី ថី ដែលជាសមាជិកបណ្តាញសហគមន៍ព្រៃឡង់, ៤ លោក មេន ម៉ាត់ សកម្មជនបរិស្ថាន ក្រោយការចាប់ខ្លួនពួកគេត្រូវទទួលរងនូវអំពើហិង្សាពីសំណាក់កម្មករក្រុមហ៊ុន មុនពេលបញ្ជូនទៅកាន់អធិការដ្ឋាននគរបាល ស្រុកសំបូរ ខេត្តក្រចេះ ដែលការចាប់ខ្លួននេះធ្វើឡើង នៅចំណុចដំបូកស ភូមិរមួល ឃុំបឹងចា ស្រុកសំបូរ ខេត្តក្រចេះ។
ការចាប់ឃាត់ខ្លួនសកម្មជន ព្រៃឈើទាំង៤រូបខាងលើ ត្រូវបានបុគ្គលិកក្រុមហ៊ុន ស៊ីងបាយអូតិក (Think Biotech) អះអាងថា ពួកគេ បានចូលទៅក្នុងបរិវេណដីក្រុមហ៊ុន និងបានថតរូបភាពផ្សេងៗ ដោយគ្មានការអនុញ្ញាត។
យ៉ាងណាក្តី បើតាមលោក សាំង សែនករុណា អ្នកនាំពាក្យសមាគមការពារសិទ្ធិមនុស្សអាដហុក បានថ្លែងថា ក្នុងពេលចាប់ខ្លួននោះ លោក អ៊ូច ឡេង មិនបាននៅក្នុងបរិវេណក្រុមហ៊ុនខាងលើនេះទេ។ លោក អ៊ូច ឡេង គឺស្ថិតនៅក្នុងផ្ទះប្រជាពលរដ្ឋម្នាក់។
លោក សាំង សែនករុណា នៅមិនទាន់ធ្វើសេចក្តីសន្និដ្ឋានយ៉ាងណានៅឡើយទេ ចំពោះសំណុំរឿងនេះ។ ប៉ុន្តែលោកបានលើកឡើងថា ចេតនារបស់លោក អ៊ូច ឡេង និងសកម្មជនការពារព្រៃឈើខាងលើ ទំនងដើម្បីស្វែងរកបទល្មើសព្រៃឈើតែប៉ុណ្ណោះ។ យ៉ាងណាក្តី លោករួមជាមួយតំណាងអង្គការសិទ្ធិមនុស្សលីកាដូ និងអង្គការសង្គមស៊ីវិលផ្សេងទៀត កំពុងឃ្លាំមើលសំណុំរឿងនេះ យ៉ាងយកចិត្តទុកដាក់បំផុត។នេះបើតាមការចុះផ្សាយ របស់កាសែត The Cambodia Daily ។
យោងសេចក្តីរាយការណ៍ ក្នុងពេលចាប់ឃាត់ខ្លួនដោយបុគ្គលិកក្រុមហ៊ុន ស៊ីងបាយអូតិក (Think Biotech) បានអោយដឹងថា លោក អ៊ូច ឡេង រួមទាំងសមាជិកបណ្តាញសហគមព្រៃឡង់ខេត្តក្រចេះ ៣នាក់ទៀត បានរងនូវអំពើហិង្សានៅក្នុងក្រុមហ៊ុននោះទៀតផង។ បើតាមលោក ហេង ស្រស់ ដែលជាសហការីរបស់លោក អ៊ូច ឡេងបានថ្លែងថា «លោក អ៊ូច ឡេង និងប្រជាពលរដ្ឋខាងលើ បានចុះទៅតំបន់នោះ ដើម្បីប្រមូលព័ត៌មាន តើថាក្រុមហ៊ុននោះ បានកាប់ឈើយកមកពីតំបន់ព្រៃឡង់ដែរឬទេ?។
យ៉ាងណានៅព្រឹកថ្ងៃទី១៥ ខែមីនា ឆ្នាំ២០២០ វេលាម៉ោង៨ព្រឹកនេះ លោក អ៊ូច ឡេង និងតំណាងសហគមន៍ចំនួន៣នាក់ ត្រូវបានស្នងការដ្ឋានប៉ូលិសខេត្តក្រចេះ បញ្ជូនខ្លួនទៅតុលាការសាលាដំបូង ខេត្តក្រចេះបន្តនីតិវិធី។ ចំណែកសកម្មជនបរិស្ថាន និងតំណាងអង្គការសង្គមស៊ីវិល ដែលធ្វើការលើវិស័យសិទ្ធិមនុស្ស និងបរិស្ថានកំពុងតាមដានករណីនេះ យ៉ាងយកចិត្តទុកដាក់បំផុតផងដែរ៕
