ចេញផ្សាយ ថ្ងៃចន្ទ ទី៣១ ខែមករា ឆ្នាំ២០២១
ភ្នំពេញ៖ គណបក្សខ្មែរស្រឡាញ់ជាតិ ដែលជាអ្នកបន្តស្មារតីសង្គ្រោះជាតិ បាននិងកំពុងឆក់យកបេះដូងប្រជាពលរដ្ឋគ្រប់ទីកន្លែង ទាំងតាមបណ្តាខេត្ត និងរាជធានី។
ជាក់ស្តែងកាលពីថ្ងៃទី២៤ ខែមករា ឆ្នាំ២០២១ គណបក្សខ្មែរស្រឡាញ់ជាតិ រាជធានីភ្នំពេញ ក្រោមការដឹកនាំរបស់លោក សុខ វិបុល ដែលជាសហស្ថាបនិកគណបក្ស និងជាអគ្គនាយក-អគ្គនាយកដ្ឋានកិច្ចការបោះឆ្នោត ដោយមានការចូលរួមពីសំណាក់ថ្នាក់ដឹកនាំគណបក្សរួមមាន៖ លោក ជីវ កត្តា ប្រធានគណបក្ស លោក កង គឹមហាក់ អនុប្រធាន.លោក តាន់ ទីន អនុប្រធាន.លោក ខឺយ ស៊ីនឿន អនុប្រធាន និងលោក សៀវ វិសុទ្ធ អគ្គហេរញ្ញិក រួមជាមួយសកម្មជនជាច្រើនរូបទៀត នៅទីស្នាក់ការគណបក្សរាជធានីភ្នំពេញ ដោយបានរៀបចំពិធីប្រកាសសុពលភាពជាផ្លូវការ ថ្នាក់ដឹកនាំខណ្ឌនៃរាជធានី ចំនួន៧ខណ្ឌ រួមមាន៖១ ខណ្ឌសែនសុខ ២ខណ្ឌមានជ័យ ៣ខណ្ឌឬស្សីកែវ ៤ខណ្ឌជ្រោយចង្វា ៥ខណ្ឌច្បារអំពៅ ៦ខណ្ឌពោធិ៍សែនជ័យ និង ៧ខណ្ឌព្រែកព្នៅ ដែលជាកម្លាំងនៅមូលដ្ឋានរបស់គណបក្ស។
បើតាមលោក សុខ វិបុល សហស្ថាបនិក និងជា អគ្គនាយក-អគ្គនាយកដ្ឋានកិច្ចការបោះឆ្នោត ទទួលបន្ទុកដឹកនាំប្រធានក្រុមការងាររាជធានីភ្នំពេញ បានឲ្យដឹងថា ការរៀបចំផែនការណ៍រចនាសម្ពន្ធ័ គណបក្សខណ្ឌនិងបន្តធ្វើជាបន្តទៀត ដើម្បីប្រកាសជាផ្លូវការ អោយបានចប់រួចរាល់នៅខែមីនា ឆ្នាំ២០២១នេះ ដោយហេតុថា ពេលវេលានៃការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០២២ និងចូលមកដល់ក្នុងពេលដ៏ខ្លីខាងមុខ រួមទាំងការបោះឆ្នោតជាតិ នៅឆ្នាំ២០២៣ផងដែរ ដែលចាំបាច់ណាស់កម្លាំងមូលដ្ឋាន ត្រូវតែរឹងមាំនិងមិនអាចខ្វះបាន។
គណបក្សខ្មែរស្រឡាញ់ជាតិ បានធ្វើការប្រកាសគោលជំហ៊ររបស់ខ្លួនរួចហើយ ក្នុងការបន្តស្មារតីសង្គ្រោះជាតិ ដើម្បីនាំមកនូវការផ្លាស់ប្តូរដ៏ពិតប្រាកដនៅកម្ពុជា ដោយមិនអាចត្រឹមតែឈរឱបដៃមើល មិនបានធ្វើអ្វីសោះ ហើយប្រកាសថាខ្លួនជាអ្នកស្នេហាជាតិនោះទេ។
ដូចគ្នានេះ គណបក្សខ្មែរស្រឡាញ់ជាតិ បាននិងកំពុងពង្រៀងគោលនយោបាយគណបក្ស ដើម្បីដាក់ចេញជាប្រយោជន៍របស់ប្រជាពលរដ្ឋនៅតាមមូលដ្ឋាន ដែលពួកគាត់ចង់បាន រួមទាំងគោលនយោបាយថ្នាក់ជាតិផងដែរ។ ហេតុដូច្នេះហើយ ទើបធ្វើឲ្យគណបក្សខ្មែរស្រឡាញ់ជាតិ ទទួលបានការគាំទ្រយ៉ាងខ្លាំង ពីសំណាក់ប្រជាពលរដ្ឋ ដែលពួកគាត់អាចផ្ញើក្តីសង្ឃឹមបាន នៅបន្ទាប់ពីអតីតគណបក្សសង្គ្រោះជាតិ៕
