ចេញផ្សាយ ថ្ងៃអង្គារ ២រោច ខែចេត្រ ឆ្នាំជូត ទោស័ក ពស២៥៦៤ ត្រូវនឹងថ្ងៃទី៣០ ខែមីនា ឆ្នាំ២០២១
កែប៖ នៅរសៀលថ្ងៃទី៣០ ខែមីនា ឆ្នាំ២០២១នេះ ក្រុមការងារផែនការសកម្មភាពកម្ចាត់មីនខេត្តកែប សម្របសម្រួលដោយរដ្ឋបាលក្រុងកែប ប៉ុស្តិ៍រដ្ឋបាលសង្កាត់អូរក្រសារ បានចុះពិនិត្យស្ថានភាពគ្រាប់យុទ្ធភណ្ឌមិនទាន់ផ្ទុះចំនួន០១គ្រាប់ ស្ថិតនៅភូមិដំណាក់ចំបក់ សង្កាត់អូរក្រសារ។
តាមសេចក្តីរាយការណ៍របស់លោកចៅសង្កាត់អូរក្រសារ បានបញ្ជាក់ថា គ្រាប់នេះអាចចល័តមកពីតំបន់ផ្សេងតាមរយៈឡាន ដឹកនាំយកមកចាក់ទីនេះ ព្រោះទីនេះជាតំបន់ដីចាក់ថ្មី។ ស្ថានភាពគ្រាប់នេះ នៅល្អ អាចផ្ទុះបានគ្រប់ពេល នៅពេលមានការប៉ៈទង្គិច។
ជាមួយគ្នានេះ ក្រុមការងារផែនការសកម្មភាពមីន បានរាយការណ៍ទៅប្រតិបត្តិករដោះមីន CMAC ដេីម្បីយកទៅរក្សាទុក ឬបំផ្លាញចោលរួចផងដែរ។
ដូចគ្នានេះក្រុមការងារផែនការសកម្មភាពកម្ចាត់មីនខេត្ត ក៏សូមអំពាវនាវដល់ប្រជាពលរដ្ឋទូទៅ បេីប្រទះឃេីញគ្រាប់មីន ឬយុទ្ធភណ្ឌមិនទាន់ផ្ទុះ សូមរាយការណ៍មកអាជ្ញាធរនៅជិតបំផុត និងហាមប៉ះពាល់ ឬចល័តគ្រាប់ដោយខ្លួនឯង៕
