ភ្នំពេញ៖ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាល ចត្វាស័ក ព.ស.២៥៦៦នេះ អតីតប្រធានគណបក្សសង្គ្រោះជាតិ លោក កឹម សុខា បានផ្ញើសារជូនពរបងប្អូនប្រជាពលរដ្ឋខ្មែរ និងប្រទេសជាតិ សូមទទួលបាន ឯករាជ្យភាព អធិបតេយ្យភាព វឌ្ឍនភាព និងកិត្យានុភាពជាតិ។
មិនតែប៉ុណ្ណោះលោកក៏សូមផ្ញើនូវសេចក្តីនឹករលឹក គោរព ស្រឡាញ់ រាប់អានចំពោះប្រជាពលរដ្ឋខ្មែរក្មេងចាស់ ប្រុសស្រី ដែលរស់នៅក្នុង និងក្រៅប្រទេសទាំងអស់ ដោយមនោសញ្ចេតនា ភាតរភាពជាបងប្អូនជនរួមជាតិខ្មែរតែមួយ។
លោក កឹម សុខា ក៏សូមបួងសួងដល់គុណបុណ្យព្រះរតនត្រ័យ បារមីវត្ថុស័ក្តិសិទ្ធិទាំងឡាយក្នុងលោក មានទេវតារក្សាព្រះមហាស្វេតច្ឆត្រ ព្រមទាំងទេវតាឆ្នាំថ្មីព្រះនាម កិរិណីទេវី សូមជួយប្រោសប្រទាន ប្រោះព្រំសព្ទសាធុការពរ សិរីសួស្តី ជ័យមង្គល វិបុលសុខ បវរមហាប្រសើរ ថ្វាយ ប្រគេន និងជូនជនរួមជាតិខ្មែរទាំងអស់ សូមប្រកបដោយព្រះពុទ្ធពរទាំងបួនប្រការ គឺអាយុ វណ្ណៈ សុខៈនិងពលៈកុំបីឃ្លៀងឃ្លាតឡើយ។
លោក កឹម សុខា ក៏សូមឱ្យប្រជាពលរដ្ឋខ្មែរ ដែលជាម្ចាស់លើជោគវាសនាអនាគតខ្លួន មានឱកាសក្នុងការរស់នៅដោយសុខដុមរមនា មានសិទ្ធិសេរីភាព និងទទួលបាន នូវផលប្រយោជន៍ សេដ្ឋកិច្ច សង្គមកិច្ច វប្បធម៌និងនយោបាយ ប្រកបដោយសមធម៌ និងយុត្តិធម៌ ដែលជាគ្រឹះនៃសន្តិភាពដ៏រឹងមាំ។
មិនតែប៉ុណ្ណោះ លោក កឹម សុខា ក៏សូមឱ្យឆ្នាំថ្មីនេះ ប្រទេសកម្ពុជា និងប្រជាពលរដ្ឋខ្មែរ ចាកផុតពីគ្រោះធម្មជាតិ ជំងឺរាតត្បាតទាំងឡាយ ជាពិសេសសូមឱ្យចៀសផុតពីគ្រោះថ្នាក់នៃជម្លោះ ក្នុងពិភពលោក ក្នុងតំបន់ ក៏ដូចជាក្នុងប្រទេសកម្ពុជាផងដែរ មិនតែប៉ុន្តែលោក ក៏សូមឱ្យឆ្នាំថ្មីនេះ នាំមកនូវស្មារតីពង្រីកមិត្ត បន្ថយសត្រូវ ជាពិសេស ស្មារតីពង្រឹង និងពង្រីកសាមគ្គីភាពជាតិខ្មែរ ដែលជាកត្តាជួយទប់ស្កាត់នូវគ្រោះថ្នាក់ទាំងនោះផងដែរ៕
#TNTV #TNTVONLINE #TNHOTNEWS #KEMSOKHA #KHMERHAPPYNEWYEAR #កឹមសុខា #សួស្តីឆ្នាំថ្មី #ឆ្នាំខាល
