ចេញផ្សាយ ថ្ងៃសៅរ៍ ទី២២ ខែកុម្ភៈ ឆ្នាំ២០២០
ខេត្តកំពង់ស្ពឺ៖ ដោយក្តីអាណិតអាសូរជាពន់ពេក នូវក្មេងៗកំសត់ចំនួន០៣នាក់ គ្មានទីពឹងរស់នៅជាមួយយាយទួតជរាក្នុងផ្ទះខ្ទមចាស់មួយខ្នង ស្ថិតនៅក្នុងភូមិត្រពាំងក្រឡាញ់ ឃុំមហាសាំង ស្រុកភ្នំស្រួច ខេត្តកំពង់ស្ពឺ ដោយម្តាយបានទទួលមរណៈ ភាព និងឪពុកមានសតិមិនគ្រប់ ។
ជាមួយគ្នានេះ កាលពីរសៀលថ្ងៃទី២០ ខែកុម្ភៈ ឆ្នាំ២០២០ លោកជំទាវ ហ៊ុន ម៉ាណា និងឯកឧត្តម ឌី វិជ្ជា បានចាត់អោយក្រុមការងារមនុស្សធម៌ដឹកនាំដោយលោក ជិន ប៊ុនធឿន រួមជាមួយអាជ្ញាធរដែនដីបាននាំយកអំណោយមួយចំនួនទៅប្រគល់ជូនលោកយាយ យ៉ែម អុីម អាយុ៨៥ឆ្នាំ និងក្មេងកំព្រាទាំង ០៣នាក់នេះ ។
អំណោយដែលបានផ្តល់ជូនគ្រួសារក្មេងទាំងនោះ រួមមាន៖ ថវិកាចំនួន២លានរៀល, គ្រឿងឧបភោគ-បរិភោគ និងសម្ភារៈប្រើប្រាស់ក្នុងផ្ទះបាយមួយឈុតធំ ព្រមទាំងបានចាត់អោយក្រុមការងារផ្ទះទេវតាសិក្សាទីតាំងក្នុងការសាងសងផ្ទះទេវតាមួយខ្នងដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដើម្បីសម្រួលក្នុងការរស់នៅប្រចាំថ្ងៃរបស់គ្រួសារដ៏សែនកំសត់មួយនេះ។
សូមបញ្ជាក់ផងដែរថាគ្រួសារនេះ ម្តាយឈ្មោះ ស៊ិន ហ៊ន អាយុ៤០ឆ្នាំ (ស្លាប់) និងឪពុកឈ្មោះ ឆាំ រ៉ា អាយុ៤៣ឆ្នាំ(វង្វេងចេញពីផ្ទះ) បន្សល់ទុកនូវកូនចំនួន ០៣នាក់ កូនស្រីច្បងឈ្មោះ វ៉ាន់ ឡឹប អាយុ១២ឆ្នាំ រៀនបានត្រឹមថ្នាក់ទី១ ដោយក្មួយស្រីមានសភាពស្រវាំងភ្នែកមើលអ្វីពុំច្បាស់ ។
កូនប្រសុទី២ឈ្មោះ វ៉ាន់ ប្រុស អាយុ៨ឆ្នាំ រៀនថ្នាក់ទី១ និងកូនប្រុសទី៣ឈ្មោះ វ៉ាន់ ទូច ភេទប្រុស អាយុ៦ឆ្នាំ មិនទាន់ចូលរៀន។ ដោយម្តាយក្មេងទាំង៣នាក់ កាលនៅរស់ឈ្មោះ ស៊ិន ហ៊ន ជាម្តាយកូនក្មេងៗទាំងនេះ មានមុខរបរជាកម្មករសំណង់ និងបានស្លាប់ដោយសារជម្ងឺអស់រយ:ពេល២ឆ្នាំកន្លងមកហេីយ ចំណែកបុរសជាប្តីនេះដោយសតិមិនប្រក្រតីក៏បានចាកចេញពីផ្ទះមិនបាននៅមេីលថែចិញ្ចឹមកូន ហើយថែមទាំងមិនបានផ្តាំផ្ញើអ្វីទាំងអស់ ។
ស្ថិតក្នុងស្ថានភាពបែបនេះ ក្មេងកំព្រារទាំងនេះមិនមានរបរអ្វីចិញ្ចឹមជីវិតនោះទេ រួមទាំងយាយទួតក៏ជរាទៀតនោះទើប មីងមា និង អ្នកជិតខាងដែលរស់នៅក្នុងមូលដ្ឋានក្បែរគ្នាមានចិត្តអាណិអាសូរ នោះជួយចិញ្ចឹមអោយបាយទឹកហូបប្រចាំថ្ងៃ៕
